Турдубаева Гульмира Мамаевна
Ош билим берүү институтунун директору
Турдубаева Гульмира Мамаевна 1960-жылы 13-январда кызматчынын үй-бүлөсүндө туулган. 1977-жылы орто билимге ээ болгондон кийин Ош шаарындагы бухгалтердик мектебин бүтүргөн, 1978-жылы Ош мамлекеттик педагогикалык институтунун физика-математика факультетине кирип, 1982-жылы математика адистигине ээ болгон.
Алгачкы эмгек жолун 1982-жылы Кара-Суу районунун «Учар» орто мектебинде мугалим болуп иштөөдөн баштаган. 1992-1999-жылдары аталган мектепте директордун окуу-тарбия иштери боюнча орун басары болуп эмгектенген.
1999-2000-жылдары Кара-Суу райондук билим берүү бөлүмүнүн усулкаана башчысы, 2000-2002-жылдары Ош областтык мугалимдердин билимин өркүндөтүү институтунун инновация каанасынын башчысы кызматтарын аркалап келген.
2002-2007-жылдары Ош областтык билим берүү башкармасынын мектепке чейинки мекемелер боюнча башкы адиси, мектептер бөлүмүнүн бөлүм башчысы, кадрлар бөлүмүнүн башкы адиси кызматтарында эмгектенди.
2008-жылдан тартып Ош областынын мамлекеттик администрациясынын билим берүү, маданият, жаштар саясаты жана спорт бөлүмүнүн башкы адиси кызматында иштеп, 2011-жылдан Ош областынын мамлекеттик администрациясынын билим берүү, маданият, жаштар саясаты жана спорт бөлүмүнүн башчысы кызматын аркалаган.
2013-жылдын май айынан Кыргыз Республикасынын Жогорку Кеңешинин депутатынын жардамчысы, 2015-жылдын августунан Ош шаарынын мэриясынын уюштуруу иштери жана жергиликтүү өз алдынча башкаруу бөлүмүнүн башкы адиси болуп эмгектенген.
2016-жылдын май айынан 2016-жылдын 26-ноябрына чейин Кыргыз Республикасынын Өкмөтүнүн Ош облусундагы ыйгарым укуктуу өкүлүнүн аппаратынын социалдык мониторинг жана өнүктүрүү бөлүмүнүн башкы адиси болуп эмгектенди.
2016-жылдын ноябрынан бери Кыргыз Республикасынын билим берүү жана илим министрлигинин 2016-жылдын 25-ноябрындагы №1299/4 буйругунун негизинде Ош билим берүү институтунун директору болуп эмгектенип келе жатат.
Бул кызматтарда иштеген мезгилдерде Гульмира Мамаевна өзүн уюштуруучулук жөндөмдүүлүгү жогору жетекчи, билим берүү тармагын мыкты билген мамлекеттик кызматкер катары көрсөтүү менен областтык билим берүү тармагында жүргүзүлгөн реформаларды турмушка ашырууга, окуу-тарбия процессин мезгил талабына ылайык уюштурууга, билим берүү тармагын колдоочу мамлекеттик программалардын аткарылышына жетишүүгө, билим берүү мекемелеринин материалдык-техникалык, окуу-усулдук базасын чыңдоого, мугалимдердин чыгармачыл демилгесин өркүндөтүүгө зор салымын кошо алды.
Турдубаева Г.М. башка кызматкерлерден жоопкерчиликти сезе билген, уюштургуч, кичи пейил сапаттары менен айырмаланып турат. Акыркы жылдардагы өзгөрүүлөрдү тез жана учурунда сезе билип, базар экономикасынын талаптарына ылайык бардык тармактар менен тыгыз байланышта иш жүргүзүп келүүдө.
Г.Турдубаева өзү эмгектенген жамааттарда гана эмес облустун билим берүү, маданият тармагында, коомдук иштерде өзүн активдүү ишмер катары көрсөтө алды. Учурда облустук мамлекеттик администрациянын аялдар кеңешинин мүчөсү.
Коомдук иштерге активдүү катышуу менен облустун калкынын социалдык-экономикалык жана маданий жактан өнүгүүсүнө чоң салымын кошуп, үзүрлүү эмгектенип келүүдө.
Турдубаева Гульмира өзүнүн жөнөкөйлүгү, иш билгилиги, тырышчаактыгы менен айрымаланат, коомдук иштерге активдүү катышып, коллективдин арасында кадыр-баркка ээ.
Анын эмгеги бааланып 1997-жылы жана 2007-жылы Кыргыз Республикасынын билим берүү министрлиги тарабынан «Кыргыз Республикасынын билим берүүнүн мыктысы» төш белгисине ээ болгон. 2005-жылы Ош облустук билим берүү башкармалыгынын Ардак грамотасы, 2006-жылы Кыргыз Республикасынын билим берүү жана илим министрлигинин Ардак грамотасы, 2007-жылы Ош облусунун мамлекеттик администрациясынын Ардак грамотасы менен сыйланган.
2017-жылдын тарта Ош билим берүү институтун жетектеп, үзүрлүү эмгектенүүдө.